အိမ်ပွဲစားလုပ်မယ်ဆိုရင် မဖြစ်မနေဒါတွေသိထားဖို့လိုမယ် အပိုင်း (၅)

အိမ်ပွဲစားတို့ မဖြစ်မနေ သိရှိရမဲ့ B.C.C နေထိုင်ခွင့်၊ အိမ်အကြီးစားအသေးစားပြင်ဆင်မှု ၊ ဂရန်သက်တမ်းတိုး ၊ ဂရန်ပျောက်ဆုံးအကြောင်းကို ပြီးခဲ့တဲ့ အပိုင်း (၄) မှာဖော်ပြခဲ့ပြီးဖြစ်ပါတယ်။ ယခု တစ်ပတ်မှာတော့ အပိုင်း (၅) ကိုဆက်လက်ဖော်ပြပေးလိုက်ပါတယ်ခင်ဗျာ။

၁။မြန်မာ့ယဉ်ကျေးမှုအမွေအနှစ် ရှေးဟောင်းအဆောက်အအုံတည်ရှိရာဇုန် (နေရာ ) အတွင်းခွင့်ပြုချက်မရှိဘဲ အဆောက်အအုံ ဆောက်လုပ်ခြင်း ၊ တိုးချဲ့ခြင်း၊ ပြင်ဆင်ခြင်း ၊ ခြံဝန်းနယ်နိမိတ် တိုးချဲ့ခြင်းတို့ မပြုလုပ်ရပါ။ (အဝယ်မှားလို့ မဖြစ်တဲ့နေရာများအဖြစ် သတိပြုပါ)

၂။အစိုးရပိုင် တိုက်ခန်းများ တိုက်ဟောင်းတွေပါ ။ ခေတ်လည်းကုန်ပါပြီ။ ပိုင်ရှင်အမည်တွေ အဆင့်ဆင့် ပြောင်းလဲလာတာလည်းများနေပါပြီ။ ပြန်ဆောက်မယ် ၊ ပြင်မယ်ဆိုရင် ဖယ်ပေးရမှာက ကိုယ်။ ဈေးသက်သာတာနဲ့ မကာမိအောင် စိတ်ညစ်ရနိုင်တယ်။ ငှားနေချင်ရင် နေ ၊ ဝယ်တော့ မဝယ်ကြပါနဲ့ ။ (မြေပိုင်ရှင် ရှိသော တိုက်ခန်းများကိုသာ ဉီးစားပေးဝယ်ယူကြပါ။ )

၃။အိမ်ငှားကို ဖယ်ချင်လျှင် အောက်ပါကိစ္စတွေမှာ အိမ်ငှားများကို ဖယ်ထုတ်ရန် တရားစွဲနိုင်ပါတယ် ။ – အိမ်ငှားခ မပေးလျှင် ၊ – တရားရုံးမိန့် မလိုက်နာလျှင် ၊ – ဘေးအိမ်တွေကို နှောင့်ယှက်လျှင်၊ – အမှန်တကယ်ပြန်ဆောက်လိုလျှင် – အမှန်တကယ် ပြန်လည်ပြုပြင်လိုလျှင်၊ – ရိုးသားသောသဘောဖြင့် ပိုင်ရှင်က ပြန်ပြီးနေလိုလျှင် နှင်ထုတ်ရန် တရားစွဲနိုင်ပါတယ်။ (၁၉၆၀ပြည့်နှစ် ငှားရမ်းခ ကြီးကြပ်ရေး ဥပဒေ ပုဒ်မ ၁၂) အတိုမှတ်ရန်။ တောင်းတော့မပေး၊ ရုံးမိန့်မကြောက်၊ ဘေးကိုနှောင့် ၊ အမှန်ဆောက်ချင် ၊ အိမ်ပြုပြင်၊ အမှန်တကယ်နေချင် နှင်။

၄။ငွေပြကြေးပြ အိမ်ခြံမြေဝယ်ဖို့ ဈေးဆစ်ကြပြီဆိုရင် ငွေပြကြေးပြရန်လိုပါတယ်။ ဒါမှ ဝယ်သူကလည်း သူ့စကား သူလေးစားမယ်။ ရောင်းသူကလည်းလျှော့သင့်တာကို လျှော့ဖြစ်သွားမယ် ။ ငွေပြကြေးပြမပါဘဲ ဈေးဆစ်ရင် ဈေးညွန့်ချိုးရာ ရောက်ပါတယ်။

၅။ ရေစည်ဘယ်လောက်ကြီးသလဲ လူတစ်ယောက်နေ့စဉ်ပျမ်းမျှ ရေဂါလန်၂၀လောက်ကုန်ပါတယ်။ လူနှစ်ယောက် နေ့စဉ်ရေတစ်ပီပါလို့ မှတ်လည်းရပါတယ်။ လုံလောက်တဲ့ရေကန် (ရေစည်) ပါရှိဖို့လည်း လိုအပ်ပါတယ်။

၆။ လှေကား၏ ကောင်းခြင်း တိုက်ခန်း၊ ကွန်ဒို ဝယ်မယ်ဆိုရင် လှေကားကောင်းခြင်းကို အထူးဂရုစိုက်ပါ။ ဓာတ်လှေကားရှိတာလည်းရှိတာပေါ့။ စေ့စပ်တဲ့ “ဝယ်လက်” အတွက်အရေးကြီးကိစ္စပါ။

၇။ ခိုင်ခံ့ရဲ့လား လုံးချင်းဝယ်ဝယ် ၊ တိုက်ခန်းဝယ်ဝယ်၊ ကွန်ဒိုဝယ်ဝယ် ဘယ်သူတွေက ဘယ်လောက်ပဲညွှန်းညွှန်း ဒီတိုက်မှာ ရေရှည်နေရမှာက ကိုယ်၊ ဒါကြောင့် တိုက်ရဲ့ခိုင်ခံ့မှုကို ပညာရှင် ဒါမှမဟုတ် အထူးကျွမ်းကျင်သူကို ခေါ်ပြပါ ။ ငွေကုန်ခံပါ ။ မှတ်ချက်ယူပါ ။ အရေးကြီးတာ ခိုင်ခံ့ဖို့ပဲ။

၈။ ၁၃ ဆို ရှောင်ကြတုန်းပဲ ကိုယ်က အယူမရှိလည်း တိုက်ဝယ်တဲ့အခါ အများရှောင်တဲ့ ဂဏန်း‌တွေကို ရှောင်ပါ။ သိပ္ပံ နိုင်ငံကြီးတွေ မှာလည်း “၁၃” ဆို ရှောင်ကြတယ်။

၉။ ဈေးနီး ၊ ကျောင်းနီး ဝယ်တော့မယ်ဆိုရင် ဈေးနီး၊ ကျောင်းနီး ရွေးပြီးဝယ်ပါ ။ ပြန်ရောင်းတဲ့အခါ “ဈေး” ခေါ်လို့ကောင်းပါတယ်။

၁၀။ တောင်လှည့်သတိထား မြန်မာပြည်ရာသီဉတုရယ် ၊ ကမ္ဘာကြီးပူနွေးလာတာရယ် ပေါင်းလိုက်ရင် တိုက်ခန်း ” တောင်လှည့်” ကို ရှောင်တာကောင်းပါတယ် ။ ( သိပ်ပြီးပူပါတယ်။ ကိုယ်တွေ့)

၁၁။ အမှုဖြစ်နေသော ပစ္စည်း အမှုအခင်းဖြစ်နေတဲ့ အိမ်ခြံမြေကို မဝယ်ကြပါနဲ့ ။ အမှုအခင်းအားလုံးရှင်းမှ လွှဲယူလို့ရမှာပါ။ (ပစ္စည်းလွှဲပြောင်းခြင်း ဥပဒေ ပုဒ်မ ၅၂)

Union House Myanmar မှ ပရိဿတ်အများအကျိုးအတွက်ဆရာကြီး ကြည်စိုး(I.C)ရေးသားသည့်အိမ်ဘုရင်၏ အိမ်ပွဲစားပညာ စာအုပ်မှ ပြန်လည်ဖော်ပြပါသည်