အငှားပိုင်ရှင်နဲ့ငှားရမ်း သုံးစွဲသူတို့ရဲ့တာဝန်နဲ့အခွင့်အရေး

ငှားရမ်းသူနဲ့ ငှားရမ်းသုံးစွဲမည့်သူဆိုတာ တစ်ကြိမ်တခါ ပတ်သတ်ရတဲ့သူ‌တွေမဟုတ်ဘဲ လ နဲ့ချီ ၊ နှစ်နဲ့ချီရေရှည်ညှိနှိုင်းဆက်ဆံရမဲ့ သူတွေဖြစ်လို့ မငှားခင်ကတည်းက ငှားရမ်းခြင်းနဲ့ပတ်သတ်တဲ့ အချက်အလက်များကို ပြည့်ပြည့်စုံစုံလေ့လာထားမှသာ မဖြစ်သင့်တဲ့ပြသနာတွေမဖြစ်ကြရမှာပါ ဒါကြောင့်မို့ အငှားပိုင်ရှင်နဲ့ ငှားရမ်းသုံးစွဲမည့်သူတို့ လိုက်နာရမဲ့ တာဝန်နဲ့ ဘယ်လိုဘယ် ပုံအခွင့်အရေးများလည်းရရှိနိုင်တယ်ဆိုတာ မျှဝေပေးလိုက်ပါတယ်ခင်ဗျာ ပစ္စည်းလွှဲပြောင်းရေး အက်ဥပဒေ ပုဒ်မ ၁၀၈(က)နှင့် (ခ) အရ…

အငှားပိုင်ရှင်တို့လိုက်နာရမည့်တာဝန်(၂)ချက်

၁- မိမိပစ္စည်း၏ ချို့ယွင်းချက်ကို ငှားရမ်းသူအားကြိုတင်ပြောပြရမည်

၂- ငှားမည့်ပစ္စည်းကို ငှားရမ်းသုံးစွဲမည့်သူအား လက်ရောက်ပေးအပ်ရမည်

အငှားပိုင်ရှင်တို့ ရနိုင်မည့်အခွင့်အရေး (၂)ရပ်

၁- ပစ္စည်းလက်ရောက်ပေးအပ်ထားသည့်ငှားရမ်းစဉ်ကာလအတွင်း ငှားရမ်းခကို အပြည့်အဝရယူခွင့်ရှိသည်

၂- ငှားရမ်းပါစာချုပ်အတိုင်းအသုံးပြုခြင်းဟုတ်မဟုတ် ကြည့်ရှူပိူင်ခွင့်ရှိသည်

ငှားရမ်းသုံးစွဲမည့်သူတို့လိုက်နာရမည့် တာဝန် (၇)ချက် (အတိုမှတ်ရန်)

၁။သိရင်ပြောပြ

ပိုင်ရှင်မသိနိုင်သည့်အကျိုးအမြတ်တို့ ရှိနိုင်ပါက ငှားရမ်းသူမှ သိလျှင် ပြောပြရမည်။

၂။ငှားခကိုယ်ပေး

ငှားရမ်းစဉ်ကာလအတွင်း ငှားရမ်းခကို အပြည့်အဝ (သို့မဟုတ်) စာချုပ်ပါအတိုင်းပေးရမည်။

၃။မူမပျက်နဲ့

ငှားရမ်းသူက မိမိငှားထားသည့်ပစ္စည်းကို မူလအခြေအနေအတိုင်း မပျက်စီးအောင် စောင့်ရှောက်ရမည် ( ငှားရမ်းမည့်ပိုင်ရှင်က အငှားစာချုပ်မှာ ဤအချက်ကို ထည့်ရေးသင့်သည်)။

၄။ပျက်လျှင်ပြောပြင်

ငှားရမ်းထားသည့်ပစ္စည်း တစ်စုံတရာချို့ယွင်းပါက ပိုင်ရှင်အားအသိပေးညှိနှိုင်းပြီးမှ ပြင်ဆင်ရမည်။

၅။ပေါ်လျှင်ပြေးပြော

ငှားရမ်းပစ္စည်းမှာ ဥပဒေအရ ထိခိုက်ခံရတာတို့ ၊ ပျက်စီးတာတို့ ပြသနာတစ်စုံတရာပေါ်လာလျှင် ထိုအကြောင်းအရာကိုပိုင်ရှင်သိအောင် ချက်ချင်းအကြောင်းကြားရမည်။

၆။အခြားမသုံး

အငှားစာချုပ်ပါသဘောတူညီချက်မှလွဲ၍ တိုက် / တိုက်ခန်း/မြေကွက် ကို အခြားကိစ္စ၌ သုံးခွင့်မရှိပါ (လူပဲနေပါမယ်ဆိုပြီးစာချုပ်ချုပ်ထားလျှင် ဆိုင်ဖွင့်တာတို့ ဘော်ဒါဆောင်ဖွင့်တာတို့ လုပ်ခွင့်မရှိပါ) ။

၇။သက်ကုန်ပြန်အပ်

ဆက်မငှားဖြစ်လျင် ၊ ငှားရမ်းစာချုပ်သက်တမ်းကုန်ဆုံးလျှင် ပိုင်ရှင်အားမပျက်မကွက် ပြန်အပ်ရမည်ဖြစ်ပါတယ်

ပစ္စည်းငှားရမ်းသုံးစွဲသူတို့ရရှိမည့်အခွင့်အရေး(၆)ရပ်

၁။မြတ်လျှင်ခံစား

ငှားရမ်းထားစဉ်အတွင်း အငှားပစ္စည်း၏ အကျိုးအမြတ်များအား လုံးကို ငှားရမ်း‌နေထိုင် သူကသာ ရရှိမည် (ငှားရမ်းပြီးဆိုင်ဖွင့်တယ် အကျိုးအမြတ်အများကြီးရတယ်ဆိုရင် ငှားရမ်းသူသာရရှိတယ်ပြောတာပါ ပိုင်ရှင်နှင့်မဆိုင်ပါ) ။

၂။မဟုတ်က ငြင်း

ငှားရမ်းစဉ်က ပိုင်ရှင်ကတိပြုတဲ့အတိုင်း ပစ္စည်းအခြေအနေက ဖြစ်မလာဘူး (ဉပမာဆောက်လက်စ ဂိုထောင်က ဆောက်ပြီးရင် ကားနှစ်စီးထည့်လို့ရတယ် ပြောပေမဲ့ တကယ်တမ်းထည့်မရတာမျိူး) ဆိုရင် ငှားရမ်းသူကငြင်းခွင့်ရှိသည်။

၃။ခွင့်ပြုမှပြင်

ပိုင်ရှင်ဆီမှ ခွင့်ပြုချက်ရမည်ဆိုလျှင် အငှားပစ္စည်းကို လိုသလို ပြင်နိုင်ပြီး ကုန်ကျစရိတ်ကို နှစ်ဦးသဘောတူညီ ပေးရမည်။

၄။အခွန်သူပေး

ငှားရမ်းထားစဉ် ပစ္စည်းနဲ့ပတ်သတ်သော အခွန်အခများကို ဥပဒေအရ ပိုင်ရှင်ကသာ ပေးဆောင်ရမည် ။ သို့သော် စာချုပ်ပါအတိုင်းလည်း လိုက်နာကြလို့လည်းရပါတယ်။

၅။ပြောင်းလျှင်ဖြုတ်သွား

ငှားရမ်းသုံးစွဲစဉ်အတွင်း ပိုင်ရှင်ခွင့်ပြုချက်နဲ့တပ်ဆင်သုံးစွဲထားသည်များကို ငှားရမ်းကာလပြီးမြောက်သွားချိန်မှာ ပြန်လည် ဖြုတ်ယူသွားနိုင်သည် အခြားပစ္စည်းတော့မပျက်ရပါ (ဥပမာ – အဲကွန်းကိုခွင့်ပြုချက်နဲ့တပ်ဆင်ပြီးနေခဲ့တယ်ဆိုရင် ပြောင့်ရွေ့ချိန်မှာ အဲကွန်းကို ပြန်ယူနိုင်ပါတယ် ) ။

၆။တူမှထပ်ပေး

ပိုင်ရှင်သဘောတူညီချက်သာရလျှင် ငှားရမ်းပစ္စည်းများကို ထပ်ဆင့်လွှဲ၍လည်းရ ၊ ပေါင်နှံချင်လည်း ရပါသည် ( ပိုင်ရှင်သဘောတူဖို့တော့ အရေးကြီးသည်)။

Union House Myanmar မှ ပရိဿတ်အများအကျိုးအတွက် ဆရာကြီး ကြည်စိုး(I.C) ရေးသားသည့် အိမ်ဘုရင်၏ အိမ်ပွဲစားပညာ စာအုပ်မှ ပြန်လည်ဖော်ပြပါသည်